لا نريد ان نعود بان الي الوراء كثيرا لكي نتحدث عن التدخل الاجنبي في السودان … و لكن دعونا نتحدث عن حمي رفض التدخل الاجنبي السائدة في السودان و خارجه هذه الايام … حكومة و معارضة و جماهير … و ما بينهم من امور متشابهات.
هل المقصود به رفض تدخل اي انسان غير سوداني في الامر السوداني؟ ام هل المقصود به رفض تدخل الخواجات في الامر السوداني؟ ام المقصود به هو رفض تدخل اهل الكتاب في الامر السوداني؟ ام ماذا؟و بما ان اهل الانقاذ هم اكثر الناس صراخا و عويلا رفضا لهذا التدخل الاجنبي الغير واضح المعالم… دعونا نسأل اهل الانقاذ انفسهم عن القوات متعددة الجنسيات التي كانت تناصرهم في حروبهم الجهادية بحثا عن بنات الحور و اولاد الحور في بقاع السودان المختلفة.فمن اين اتت جيوش اسامة بن لادن و رفاقه؟ و من اين اتي الغنوشيون؟ و من اين اتي ناس جبهة الانقاذ؟ و من اين اتي كل الذين شاركوا في تعذيب السودانيين داخل بيوت الاشباح ؟ هل كان هؤلاء و اولئك سودانيون خلص؟ ابدا طبعا لا.فما هو الامر الجديد اذن يا اهل الانقاذ؟ ان في الامر لكلام… لان اهل الانقاذ ان جلدوا و عذبوا اهل السودان بانفسهم و لم يستعينوا بجهابزة التعذيب الاجانب لقلنا لهم معليش نعيش و ناخذ غيرها… لكن الامر كان مختلف… فتعذيبهم للناس كان من النوع ابو كديس.
اين التقت المعارضة مع النظام في حمي رفض التدخل الاجنبي؟
التقوا في عملية قبول القروش فقط …سوي ان كانوا جماعات او افراد … و اذكر ان احد المعارضين عائش علي نفقة المجتمع الدولي من اكل و شراب و سكن و الذي منه… قال لي لازم نحن نعارض التدخل الاجنبي في السودان… قلت له خلاص ادي الناس بيتهم و رجع ليهم قروشهم … لاننا غرقانين في التدخل الاجنبي لي اضنينا… و لا يمكن ان نلحس القروش و نقول ليهم ما تدخلوا في بلادنا… يا جماعة قولوا لينا كلام يركب لينا في راسنا.فلا سيادة لشعب عائش عالة علي التدخل الاجنبي المزعوم… فان كنا نريد رفض التدخل فيجب ان تكون لنا كرامة و سيادة و كلها امور راس رمحها الحرية.عندي صديق عزيز كان بيفتخر بان جده جاء مع حملة كتشنر لفتح السودان … و عندما سمع بحمي التدخل الاجنبي قال لي نحن ضد التدخل الاجنبي لانه كذا و كذا… فقلت له هل كان كتشنر سودانيا من قبيلة الهواوير؟ يا جماعة اتقوا الله في السودان.حكي لي صديق عزيز بانهم كانوا في تظاهرة ما ضد دولة اجنبية ظالمة ارادت ان تغير من الاوضاع في السودان … و كان بجواره شخص يصرخ بصوت عال لا … لا … لكذا و عندما نظر اليه وجده يلبس جلابية بيضاء مصنوعة من جولات دقيق مكتوب عليها اسم دولة اجنبية لا داعي لذكرها … فهل هنالك تدخل اجنبي اكبر من هذا يا عالم؟و قال لي صديق اخر لماذا يريد العرب في السودان بان يكونوا اخر اجنبي يدخل السودان… و اضاف قائلا دعوا القوم يدخلوا كما دخل الاخرون … خلاص حبكت الان فقط… نحن روحنا طلعت… يجيء اجنبي … يجيء شيطان دي ما مهمة… بصراحة كلامه فيه رسالة عميقة… مش الناس ترفض التدخل الاجنبي و تعمل في العمائل المهببة دي.عموما التدخل الاجنبي امر قديم في السودان و مش حاجة جديدة و اخره كان النظام الانتحاري الانقاذي نفسه الذي يرفض التدخل الاجنبي الان و طبعا هو غير جاد في هذا الصراخ الرافض… الشغلانية كلها عويل ساي… و يا خبر بقروش بكرة يكون بلوشي.
